ادري اني صايرة هالايام سلبيه وحزني احيانا واضح في كلماتي اللي انثرها هنا وهناك على هذه المدونة..احيانا ودي اسحب مواضيعي كلها اللي تبين مشاعري هنا..بس احس وش الفايده؟ وش الفايده اذا كان الهدف اساسا هو طرح افكاري والتعبير عن مشاعري خلال هذه المدونة! لكن المشكلة اني هالترم بالذات متحطمه نفسيا بسبب اشياء كثير حصلت معاي هالفتره..بس اتوقع ان شا الله انها فتره وتعدي مثلها مثل اللي قبلها مو؟ مافي شي يبقى على حاله مثلما يقولون.
عموما موضوعي هو "خلينا نعطي الحياه فرصه" حتى اني خليته توبكي في المسن..رغم اني للآن أشعر بالحزن والخوف والفراغ..وكلها للأسف بسبب شي واحد..إلا أنني دايم ولله الحمد بفضل من الله محظوظة بالايام الحلوة اللي تتخلل كآبتي. احيانا من اقوم من النوم احس انه اليوم بيكون يوم حلو مع اني لسه ماجربته؟خخخخ بس هذا الشي ألهمني لكتابة موضوعي:
الحياه اساسا هي كذا..لازم كل فتره وفتره يجرب الانسان فيها بعض المصاعب والازمات سواء النفسيه او العاطفيه او الماديه وغيرها واحيانا تجي كلها دفعه واحده..بس الحلو فيها انها تروح مره واحده :)
بس لابد الانسان..انه يتفكر في الكون..وفي ابداع خالق الكون..ويسأل نفسه: الرب اللي أبدع في خلق السماء..ولونها بألوان خلابه على اختلاف الاوقات"نهار ليل شروق غروب..الخ" ورسم عليها الغيوم بأشكال غريبه وابداعيه..وزخرفها بالنجوم البراقه..الرب اللي سوا كل هذا..هل يعقل انه غير قادر على شفاء جروحنا؟؟ والجواب هو: "حتما هو قادر سبحانه القادر على كل شي" !!
لنفرض انك كنت امس مبسوط لآخر درجه..بس اليوم عندك مشكلة وتواجه ازمة نفسيه وتحس باكتئاب وان الدنيا شوي وتنهار فوق راسك..وتقول آآخ لو يكون اليوم مثل امس! مافكرت انه فيه شي فريد في هالسالفه؟ انه مثلما تغير حالك من امس لليوم..انه ممكن كمان بكرا يتغير حالك؟ وتصير افضل ؟ وش اللي يثبت لي بدليل قاطع انه بكرا بيكون نفس اليوم؟!
اللحظات الحلوة بحياتنا..ترى احنا نقدر نكونها..نقدر نسويها..نقدر نتمناها ونقدر نخليها تتحقق!
فرضا: اذا كان لديك صديق مقرب..واشغلتك الحياه عنه..واشغلته عنك..وودك تخلق لحظة حلوة بحياتك؟ ممكن مثلا تفاجئه بهدية وتسوي شي ممتع معاه وتطلعون لقضاء يوم كامل سوا..او حتى تعزمه على غداء!
او اذا كانت علاقتك مع اهلك شوي ضعيفه..الكل في البيت منشغل ولاهي بشغله..وودك تكوّن لحظة حلوة بحياتك؟ ممكن تفاجيء امك بقبله على رأسها..وترمي ورده على حضنها..وتهمس بإذنها دعوة "الله يطول بعمرك"..اصلا شوف الدعاوي اللي بتجيك منها..وشوف الاجر العظيم من ربي..وممكن تعزم اهلك على عشاء..او تفاجئهم في البيت بعشاء طلبيه..وتلمهم كلهم على السفره! يعني من جد ياناس ترانا احنا نقدر نخلق لحظاتنا الخاصه والحلوة في حياتنا مع احبابنا واصحابنا!!
اذا حسيت بالفراغ..لازم تملأ وقتك باللحظات الحلوة..سوي اي شي fun اي شي ممتع !! ويكون أمتع اكثر لو كان مع شخص تحبه..
اما بالنسبه للفراغ العاطفي..فما أدري وش الحل له؟ بس عموما لازم تملأ فراغك بكل شي مفيد وممتع بشرط ألا يكون طبعا محرم او من هذا القبيل خخخ =>>اهم شي اخر جمله هههههههههه
واذا حسيت بالحزن..فاسأل مجرب..انا لو قعدت طول الوقت في غرفتي افكر في الناس اللي افتقدهم او في السبب اللي خلاني أحس بالحزن أيا كان..كان صدق ماقدرت أتغلب على حزني..مع اني للآن ماتغلبت..بس فيه فرق كبير لمن تكون حزين وقاعد مع ناس..وحزين وصاك على عمره في غرفته خخخخ الثاني طبعا أشد وأقوى ولا انصحك فيه.
اما اذا حسيت بالخوف..من اي شي كان صغير أم كبير..اي مسأله بحياتك سببت لك خوف..فالدعاء الخفي بينك وبين ربك.."اللهم آمنا من كل خوف" سوف يشعرك بالأمان..لأنك عارف ان ربك معاك ..وانه بيحميك طول الوقت.
اتمنى لكم وادعي ربي يملأ حياتي وحياتكم بالسعاده والأمان والحب للأبد...
_______________________________________
الحياه حلوه للأبد
1 comment:
تدرين كل حرف كتبتيه صح..
لازم نعطي الحياه فرصه مثل ماعطتنا هي فرصه..
وصراحه يانوف انتي قويه دائماوهذا شي زين انتي ماتخلين الدنيا تلعب فيك بالعكس تقاومينها وبقوه..
الله يديم قوتك ويقوك ويقوينا كلنا على مواجهه مصاعب الحياه واحزانها ..
مروووم..^_^..
Post a Comment