انفلونزا

الظاهر اني صقعت نفسي بعين :( دايم اشوف بنات في الجامعه تعبانات من هالبرد اللي جاء الرياض وأقول وراهم طاحوا انفلونزا؟

بس الحمدلله. تعبت هاليومين كثير وغبت عن الجامعه وكملت الناقص في غيابي..لان حضرتي استنفذت كل المرات المسموح فيها والله يستر بكرا بداوم ان شا الله وبشوف وش بيصير؟ احس الدكتورات غسلوا يدينهم مني :( ولاعاد بيصدقون اعذاري بس والله انا اخر مره غبت عشان راحت علي نومه وشسوي النوم سلطان !

شلون عرفت اني تعبانه قبل يومين: اول شي بديت احس فيه شي غلط مدري ليه كسلانه بزياده..ولا فيني حيل لأي شي وراسي يعور مره.

بعدها اول ماصحيت اليوم الثاني رحت ابي افتح شباك غرفتي ولا قدرت تصدقون! من كثر التعب ماقدرت افتحه. بعدها بديت اطيح صدق

لدرجة اني ما اقدر اتحرك من الفراش. واذا تحركت احس ان الدنيا تدور وعيوني ماتشوف الا سواد !! يعني بالعربي الضغط ينخفض.

همن بدين أسخن وارتفعت حرارتي وبهذلت امي كثيررررر أمس بالذات.

شلون بهذلتي امك؟ : مافي شي بالكون ماطلبته منها تسويه خخخخ كل شوي اقول لها روحي جيبي لي هذا ولا هذاك ! كنها اصغر عيالي الله يسامحني بس عاد وشسوي ما اقدر اقوم. حتى اني بديت اهذر واجد مع ارتفاع الحراره وخليتها تسمع كل حرف اقول له بالغصب ههههه امحق من بنت بارة !

المهم عاد الحمدلله اليوم انا احسن بكثير...بس تخيلوا لو ان امي مو عندي ؟ وش كان بيصير فيني؟ مين كان بيعتني فيني؟ يااارب انك تطول بعمر امي ياااارب وتخليها لي وتعطيها الصحه والعافيه وتجزاها كل خير على تعبها علي.

أمس بصراحه حسيت بنعمة كل شي من اصغر الاشياء مثل مجرد اني "افتح الشباك بسهولة" إلى اكبر الاشياء مثل "اني امشي بتوازن ولا اطيح" !!

حتى اني اشتقت للدراسه ههههههههه لاني غبت يومين ورا بعض ...وصايره هالايام ما اذاكر ابد ولا اتابع وش اخذنا حتى !! وبعض المواد من تالي مدري وش السالفه فيها! بس اليوم قمت وقلت لازم ارجع اشوف وش فاتني في الدروس.ان شا الله بكرا اقدر الحق على كل

شي.

وش صار يوم رحتي الطبيب؟ : رحت الطبيب اليوم عشان اخذ عذر طبي وطلبت منه يكتب لي عذر يومي الاثنين والثلاثا لاني غايبه فيهم.

ضحك علي وقال شايفتنا مستشفى؟ احنا مستوصف وممنوع نكتب يومين.اختاري يوم واحد! قلت له الشكوى لله خلاص خليها الثلاثاء. قال: خلاص آخر جواب؟ قلت لاشيخ لايكون احنا في برنامج مسابقات وانا مدري! =>> نفسها براس خشمها اذا كانت مريضه خخخ

رجعت البيت ومعاي العذر الطبي..ووصفة لمضادين حيويين .. وابتسامتي! مدري ليه كنت مستانسه بس الحمدلله اني خلصت من سالفة الطبيب لاني اكره المستشفيات ولا احبها ولا اواطنها :(

ملاحظة: ترى صورة يامابي داخلة عرض ادري خخخ

_____________________________________________

همسة: اللهم اني اسألك بأسمائك العظمى أن تشفي كل مسلم مريض وأن تعافينا في أبداننا واجعلنا اللهم شاكرين لأنعمك انك انت السميع العليم!