كلمة "النجاح" ممكن احد يقول لي وش معناها؟

من يوم وانا صغيرة وانا احلم اكون " شي" بالمستقبل. بالمدرسة كانوا دايم يسألوننا وش بتصيرون اذا كبرتوا؟ كنت دايم سبحان الله أبي اصير مدرسة..مدرسة انجليزي! لمن كنت في الابتدائي كنت شاطرة في الانجليزي واذكر مرة شاركت في حفل في المدرسة وغنيت أغنية You and me وكانت هذه اغنية انجليزية لفيلم كرتوني اجنبي وحفظتها منه خخخ اذكر ان الاستاذه طااارت من الفرحه يوم شافت بنت في الفصل تعرف انجليزي وتعرف تغني بعد ههههه انبسطت مررره من تعابير ابله وسيمه لمن شفتها مبسوطة فيني. بعدين لمن كبرت ووصلت الثانوية..اذكر كنا نتناقش مع بعض في الاقسام اللي ودنا ندخلها في الجامعه لاننا على وشك التخرج. واحده من البنات قالت: انا ان شا الله بدخل أدب انجليزي. اذكر اني استغربت مرره وقعدت احاول واقنع فيها انها تغير رأيها وقعدت ساعتين وانا احاول ولا في فايده معها لانها كانت مصرة وتعرف وش تبي بالضبط =>> بس الحين لمن اتذكر كلامي لها..احس خيرر وش تبين انتي في الناس؟ خخخخخخ

مين كان يتوقع ؟ اني انا بيكون مصيري اني اتخصص في الادب الانجليزي؟ هههههههههههههه
رغم كرهي لهالقسم "قبل ادخل الجامعه" ورغم محاولاتي في اقناع صديقتي للعدول عن رغبتها, بالنهاية دخلت ادب انجليزي! بس الحين مرره احبه واحس انه هذا مكاني وهذا اللي يناسبني..الله مايكتب الا اللي يناسبنا.

الحين انا لأني وصلت منتصف الطريق في الجامعه "سنة ثانيه او مستوى رابع" أحس اني مستقره وفاهمه اسلوب المواد واسلوب الدكتورات وفاهمه الجامعه وفاهمه كل شي ..لان اول كنت احس اني داخله عالم غريب وكنت توني قاعده اسكتشف اشياء. فالحين انا دخلت مرحلة الـ " وش بسوي لمن اتخرج؟" خخخخخخ يعني اوكيه الحين انا استقريت...بس بعدين وش بيصير؟

عموما هذا السؤال: " بس بعدين وش بيصير؟" دايم اسأل نفسي فيه في الحياة عموما...مو بس في مسألة دراستي. بس من جد ما ادري هل بينكتب لي النجاح في هذا التخصص؟ فيه ناس طبعا لهم تعريفهم الخاص بالنجاح..فيه اللي يقول لك انا النجاح عندي يعني اني اتخرج وافتك من الجامعه. وفيه من يقول النجاح اني اتفوق في الجامعه. وفيه من يقول النجاح اني القى وظيفه ممتازة بعد التخرج.

اقعد اطاالع فيهم وفي تعريفاتهم للنجاح وبصراحه اتنـــح لان مدري وش يبون في هالحياة؟ لان اذا كل يوم ندرس ونروح الجامعه ونقعد ساعه في طريق الملك فهد "او طريق خريص" ولمن نوصل الجامعه نضطر ننطق ونحضر المحاضرات كلها واللي ممكن تستمر الى العصر. والاختبارات والمذاكره والبحوث والواجبات وكل المتطلبات اللي تلزمنا حتى "ننجح"..كل هذه الاشياء وبالاخير "نبي بس نتخرج ونفتك؟"

اللي طرّى الموضوع علي اليوم لمن شغلت التلفزيون وشفت مقابلة على mbc1 مع الشابه الفلسطينية الاكثر من رائعه "اسماء" اللي تعيش في الدنمارك. هذه البنت هاجروا اهلها من زماان الى الدنمارك وتعلموا اللغه الدنماركية، واستقروا هناك رغم ان الي هناك فيهم شيوعيين ومتعصبين كثير وبعضهم ما يؤمنون بوجود الله اساسا ويكرهون يشوفون مظاهر عبادة لله (لاحول ولا قوة الا بالله)، بالرغم من ذلك حافظت على حجابها واستطاعت بذلك ان تكسب اعجاب واحترام الشعب الدنماركي. والدليل انها لمن اختارت تتخصص في السياسة والتحقت بالحزب اليساري، عرضوا عليها الحزب انها تترشح للبرلمان !! وفعلا ترشحت و"صوتوا لها الشعب الدنماركي" ونجحت بالحصول على مقعد في البرلمان!! الحين هي مو مجرد بنت مسلمة محجبة تملك مقعد في البرلمان الدنماركي..هي كمان تطلع التلفزيون وتناقش الناس في مواضيع سياسية في برنامج سياسي. وتسوي اشياء كثير..حتى انهم سووا معها مقابله في mbc1.

بصراحه هذا هو النجاح عندي. النجاح مو اننا بس نتخرج. النجاح اننا لمن نتخرج نسوي شي مهم في الحياة. وأنا لا أقصد نجاحا سياسيا مثل أسماء لمجرد اني ضربتها كمثل للنجاح، بل أقصد نجاح عام في الحياة.

النجاح الي احلم فيه: هو اني اتخرج واخدم بلدي بما تعلمته من تخصصي. اذا كان تخصصي انجليزي فأتمنى اني افيد اهلي وبلدي بلغتي الثانية اللي تعلمتها خلال اربع سنوات من دراستي. اتمنى أؤلف كتب باللغه الانجليزية توصل المفهوم الحقيقي للإسلام.حتى يقرأها من لايتكلم اللغه العربيه ولا يعرف الاسلام. لأنني أريد أيضا أن اخدم الاسلام بذلك.

النجاح عندي هو اني لمن اقوم في يوم من الايام من النوم واقول آخ وأخيرا سويت شي مهم في الحياة!

اتمنى خلال سنوات دراستي في الجامعه اني اكون تعلمت من اختلاطي بالمجتمع دروس كثيرة. وأكون أفدت غيري سواء الطالبات او الدكتورات وغيرهن.اتمنى لمّن أتخرج ان الكل يذكرني بالخير. لأن الجامعه جزء من حياتي.

_____________________________________
تبون تضحكون؟ : من حوالي سنة علقت على دولاب ملابسي رسمة وراسمه فيها "اوبرا" على اساس انها مستضيفتني في برنامجها خخخخ وصرت دايم كلما افتح دولابي اطالع فيها واقول صدق بتطلعين في اوبرا يوم من الايام ؟ الييين عاد صدقت نفسي هههههه وبعدين سمعت ان اوبرا احتمال تلغي برنامجها السنة الجاية عشانها بتتفرغ لشركتها اكثر. تدرون عاد تحطمت صح وحسيت اصلا من البداية مافي امل. بس اني ماشقيت رسمتي للحين ولا نزلتها من دولابي.