قبل سنتين..كنت اسمع الناس يقولون ان الانسان ينسى مع مرور الزمن احزانه..وكنت اصدقهم. إلين دخلنا عام 2007 اللي هي السنة اللي دخلت فيها جدتي المستشفى وتوفت في آخرها رحمة الله عليها.
طبعا كانت هذه السنة اول سنة بحياتي اجرب فيها طعم الحزن الحقيقي..مو أي حزن..مو حزن يتعلق بالمدرسة ومشاكلها..ولا يتعلق باختبارات الوزارة ايام ثالث ثانوي..ولايتعلق بصديقاتي..كان يتعلق بالموت.
وجات سنة 2008 وبصراحه كانت سنة مريحة شوي..كنت اشتغل فيها على حزني عشان أتخطاه..أغلب هالسنة كنت ادرس ومهتمه بالدراسه مرره ..عشان انسى حزني على جدتي..بس كانت فيه اوقات ..اقوم من النوم فجأه واقعد اصيح واتذكر جدتي ومواقف كانت تجمعني فيها.
ماصدقت اني تحسنت كثيرر خلال هالسنة..وفرحت كثير ان نفسيتي تحسنت. صرت اضحك اكثر وأستهبل في البيت اكثر.
لكن بنهاية عام 2008 وبالتحديد قبل شهرين تقريبا، عرفت عن شخص كنت مررررررره احبه, انه مات. لا ومات مقتول في الفلبين بعد !
قعدت اصيح في غرفتي اول ليلة..على أمل اني اطلع حرتي كلها فما يبقى من دموعي شي عشان لا ابكي عليه مره ثانيه ويصير فيني نفس اللي صار اول لمن توفت جدتي.
الان مر شهرين تقريبا مو فاكره بالضبط كم. بس ماقدرت اني استوعب انه مات الى هاللحظة هذي. احس اللي سمعته مو صدق خخخخ
كذا مره تذكرته وقعدت ابكي عليه..احيانا اكون مع اهلي وفجأه اتذكره وتدمع عيوني واحاول أخفيها عشان اهلي لاينتبهون.
احب اقول للناس اللي قبل سنتين قالوا لي ان الانسان ينسى حزنه مع مرور الزمن..انه هذه اكبر كذبه. صحيح ان الحياة ماتتوقف. صحيح اني اقوم كل صبح والبس تنورتي وعبايتي واستعد للجامعه واحضر المحاضرات واسلم ع البنات..واللي يشوفني يقول ماشا الله البنت قوية. بس قولوا لي ليش احيانا اتذكرهم؟ ليش ما انساهم تماما؟
سبحان الله الانسان ممكن ينسى انه يفرش اسنانه اول مايقوم..ممكن ينسى يحضر موعد معين بالوقت المناسب..ممكن ينسى يجيب معاه الكتاب اللي وصاه صديقه يجيبه معاه في الدوام..بس مستحيل ينسى أحبابه اللي راحوا.
البنات اللي عارفين بسالفتي احب اقول لكم اني لمن اكتب هنا تراني افضفض واحس ان الشاشه تسمعني وتشيل عني بعض همومي. بعض الناس يكتبون قصائد وخواطر ويفضفضون فيها عن احزانهم..بس انا ما اقدر افضفض الا هنا ..فسامحوني.
اللي استدعاني لكتابة ما أكتبه الآن: قبل شوي ختمت مسلسل كوري اسمه "لو كنت عاشقا مثلهم" ..القصة تدور على اثنين يتعرفون على بعض في المستشفى لأنهم جميعا مرضى. يقررون يعيشون سوا في الريف حياة طبيعية..بس بالاخير حبيبها يموت.
اول ما شفت المشهد اللي يبين انها تبكي في العزا..حسيت بإحساسها لدرجة ماتتخيلونها..مع اني دارية انه مجرد مسلسل..بس فعلا اول مرة اشوف شي في الشاشة واقول : ايه والله مريت في نفس الحاله..!
وياليت لو اني ما اقدر احس فيهم..هم ومسلسلاتهم الله ياخذ ابليسهم قلبوا المواجع خخخخخخ
_______________________
تجنبا للندم :اذا فيه شخص تحبه مره بس هو مايدري انك تحبه او انك شاك في انه مايدري عن حبك له، رجااائي انك تعلمه بأقرب وقت.
1 comment:
احــــبك نــــوف
سبحان الله لي يومين ناويه اكتب عن جدي في سبيسي !!
وانتي كتبتي عن جدتك
الله يرحمهم جميع ..
Post a Comment