ابلة هيفا وابلة الجوهرة وبوش وشارون

لمن كنت بالثانوي ...عشت 3 سنوات مريرة تحت اضطهاد ابله هيفا والحمدلله ربي خرجني من المدرسة وافتكيت منها. كانت هي الوكيلة في قسم الثانوي ..وكانت تفرد عضلاتها كل صباح علينا..احس كانت شغلتها الوحيده في الحياة انها تهزئنا خخخ

اللي ذكرني فيها هو أمس لمن كنت في بيت خوالي..وجابوا سيرة المديرة الجوهرة اللي تكون مديرة بنات خالي حاليا، وسابقا كانت مديرة واحده من خالاتي!

يعني ماشا الله ابلة الجوهرة قامت بخدمة هذا البلد لأكثر من 40 سنة !! خالتي مها كانت طالبة في مدرستها ايام الابتدائي والمتوسط والثانوي..والحين خالتي مها عيالها اطول منها ماشا الله !! هذي المديرة تخرجوا من مدرستها أجيال وأجيال ...طالباتها القديمات أصبحوا الان امهات !!

وكل هذه الاجيال والاجيال من الاطفال حاليا..والاطفال "سابقا" ...كلللهم مافي احد منهم يذكرها بالخير خخخخخخخخخخخ

استغرب هذه المديرة وش هدفها؟ لمن تعامل الكل بقسوة واحتقار وتهزيء 24 ساعه ؟ استغرب لهالدرجة تبي تخلص في عملها؟ اصلا هذا المفهوم اللي عندها والي عند ابله هيفا وامثالهم ، مفهوم خاطيء للأسف! يفكرون ان التهزيء بيخلي المدرسة تنضبط...بس مشكلتهم نسوا القاعده المعروفه في ديننا الحنيف : لاتكن لينا فتعصر ولا تكن قاسيا "فتكسر" !!

يعني فيه اوقات للشده واوقات للين ...مو كل الوقت صراخ وتهزيء وتخويف وتهديد ! كيف بيكونون قدوة لهذولي الاجيال؟

اكثر شي شدني لأكتب عنه في مدونتي: ان ابلة الجوهره الآن ماحد يذكرها بالخير..

تخيلوا انا اموت ولا احد بالدنيا يذكرني بالخير...؟! مو شينة ؟ أشين شي ان الناس تكرهني...

ابلة الجوهرة وابلة هيفا وابلة خضرا "هذه كانت مديرتي الشريرة ايام الابتدائي" خخخ بصراحه مايفرقون عندي عن بوش وشارون.

كلهم يتميزون بالشر والعدوان في اسلوبهم مع الناس.مهما اختلفت الطريقة، يظل القاسم المشترك بينهم قائم وموجود خخخخ

______________________

همسة: اللهم لاتجعل في قلوبنا غلا للذين آمنوا ...اللهم حببنا إلى عبادك الصالحين وحببهم إلينا.